Хүнс, хөдөө аж ахуй, хөнгөн үйлдвэрийн сайд Ц.Идэрбат:

-Энэ сар манай салбарт их чухал сар. Засгийн газар анхаарлаа хандуулж байна. 150 тэрбум төгрөгийн асуудал төсвийн тодотгол дээр яригдаж байна. Мөн 50 тэрбум төгрөгийн асуудал яригдаж байна. Олон нийтийн зүгээс стратегийн нөөц бүрдүүлэх дээр хүсэлтүүд ирж байгаа. Хүнсний ногоо худалдан авах ажиллагааг анх удаа зохион байгуулж байгаа учир бирж анхааралтай ажиллаж байна. Нийслэлийн нөөцийн махтай холбогдуулан арилжааны банк гэлтгүй аж ахуй нэгжүүдэд зээлийн хөнгөлөлт олгох бололцоог бүрдүүлж өглөө. 150 тэрбум төгрөг төмс, ногоо болж байгааг ибаримтаар хянах тогтолцоо бүрдэж байна. Махны мөнгийг ч ибаримтаар хянана. Аж ахуй нэгжүүд нөөцийн мах бүрдүүлэхэд урамшуулал авах хэмжээний юу гэдгийг хянана. Идэш арга хэмжээг зохион байгуулна. Үнийн өсөлтөөс урьдчилан сэргийлэхийн тулд 21 аймгийг 6 бүс болгон энэ арга хэмжээг зохион байгуулна. Цаг үеийн асуудлаар ярихад өнгөрсөн хоёр хоногт ОХУ-тай уулзлаа. Энэ үеэр мал эмнэлгийн асуудлаар ярилаа. ОХУ-ын био комбинатуудтай танилцаж, хамтын ажиллагаагаа өргөжүүлнэ. Мөн газар тариалан, хөрсөө хамгаалах тал дээр онцгой анхаарна. Шинэ Хоршоо хөдөлгөөний хүрээнд 800 гаруй тэрбум төгрөг малчид дээр очсон. Хуучин 6 хувийн хүүтэй зээл малчдад олдоггүй байлаа. Энэ жил энэ хөдөлгөөнд шинэ мөнгө байхгүй. Өмнө олгосон хүүгийн татаасаар болгоно. Бид ноолуур, ноосны үйлдвэртэй болсон. Үүний үр дүнд ноосны үнэ гайгүй байлаа. Ноосон дээр л гэхэд 50 тэрбум төгрөгний хөнгөлөлттэй зээл олголоо. Энэ бол манай салбарын өсөлт, хөгжилтөд эерэг нөлөө үзүүлж байна. Одоогоор бидэнд зургаан сая тун вакцин үхэрнүүдэд хэрэгтэй байна. Дундын зуучлагчгүй ОХУ, БНХАУ-ын үйлдвэрээс авч байна. Вакцины үйлдвэр барихад өртөг өндөр. Тиймээс өтгөрүүлсэн шингэн авчирч Монголдоо савлах гэж байна. Хоёр хэвшлийн шүлхийний вакциныг авч байгаа үнэ савлаж байгаа үнээс бага байж л бид ашигтай байна. Ажлын хэсэг ажиллаж байгаа. Эдийн засгийн хувьд үр ашигтай л байх ёстой. Бидний зорилго 2027 он гэхэд Монголдоо тарьсан тарилгаа хиймээр байна.

Улаанбаатар хотын захирагч Б.Пүрэвдагва:

-Өвөлжилтөд анхаарч байна. 573 төсөл, хөтөлбөрийг эхлүүлж, 83 хувьтай явж байна. Иргэд хальтиргаагүй замтай, нийтийн тээвэр хүлээхгүй байх, агаарын бохирдол өнгөрсөн жилээс сайжрах зэрэгт анхаарч байна. Халаалт өгч эхэлсэн. 280 мянган тонн хагас коксыг бид өвөл түлнэ. 446 цэгээр түлшээ борлуулна. Энэ цэгүүд дээр түгээлт, борлуулалтыг тэгш хийнэ. Сайжруулсан түлшний стандартыг хатуу мөрдүүлнэ. Хотула апп-аар хянана. 200 машин шөнийн турш түгээлтийг хийнэ. Энэ өвөл 5,000 айл хийн зуух рүү шилжүүлсэн. Тэднийгээ хянана. Хотод 273 уурын зуух бий. Энэ бол агаарын бохирдлын 12 хувийг эзэлдэг. Наймыг нь хий рүү шилжүүлэх ажлыг хийлээ. 5.6 хувиар агаарын бохирдол буурах тооцоолол бий. Газар шорооны ажлыг зунжингаа хийлээ. Нийт 57.3 км шугамын ажлыг хийлээ. Усны татуурга, бохир усны сувгаа заслаа. 16.2 км шинэ хоолойг ашиглалтад орууллаа. Ер нь газар доорх Улаанбаатар хотдоо анхаарахгүй бол хэцүү байна. 1.8 их наяд төгрөгийг зарцуулж байж ард нь гарна. Дулааны ачаалал 146 хувиар ачааллаж байгаа. Цахилгаан 109-117 хувиар ачаалалтай байна. Бид инженер хангамжийн ажилдаа анхаарч байна. Тавдугаар дулааны цахилгаан станцын ажил 20 хувийн гүйцэтгэлтэй байна. 2028 онд ашиглалтад орно. 100 мянган айлын цахилгаан, 50 мянган айлын дулааны асуудлыг шийднэ.

                                                                                                                                       Эх сурвалж:News.mn