“Өргөө” амаржих газрын дарга асан Ж.Энхцэцэг эмийн сонсгол, эрүүл мэндийн салбартай холбоотой асуудлаар байр сууриа илэрхийллээ.

Тэрбээр, "Намайг гадагшаа сургалтад яваад ирэхэд Өргөө амаржих газрын Ж.Энхцэцэг таны талаар ярилаа гэсэн олон мэдээлэл надад ирсэн. Би сувгаа урагшлуулаад хоёр хоног уйгагүй үзсэн. Гэтэл эмч, эмнэлгийн ажилчдын нэр хүндийг унагасан зүйлсийг ярьсан байсан.

Мөн мэдрэг чанар нь ердөө 20 хувьтай оношлуурыг хэрэглэх боломжгүй гэдгээ Б.Цэцэгсайхан дарга илэрхийлсэн ч С.Энхболд сайд худалдан ав гэж хэлээд, БНХАУ-аас тэр оношлуурыг авсан байгаа юм. Тухайн үед ихээхэн шахалт дарамт ирсэн гэж Б.Цэцэгсайхан ярьсан. Бидний дээд удирдлага нь ЭМЯ. Гэтэл энэ яаманд ёс суртахуунгүй хүмүүс ажиллаж байгаа нь харамсалтай.

Би "Өргөө" амаржих газрын даргаар ажиллаж байгаад ёс зүйн хариуцлага алдсан гэсэн үндэслэлээр ажлаас халагдсан. Уг нь би ажлын шаардлага тавьж, архидалттай тэмцсэн. Эмийн сонсголоор зөвхөн "Өргөө" амаржих газрыг хөндөн ярьсныг би гайхаж байна. Энэ эмнэлгийн үйл ажиллагаа хэвийн байсан, ковидын хүнд үед манай ажилтнууд маш сайн ажиллаж, халдвартай олон эхийг эсэн мэнд төрүүлсэн.

Мөн би захирлаар ажиллахад "Өргөө" амаржих газарт санхүүгийн асуудал байгаагүй. Өр байгаагүй гэдгийг би баттай хэлнэ. Эмийн өр байсан ч түүнийг ЭМ-ийн даатгалаас авах байв. Би 10-р сарын 13-нд ажлаа хүлээлгэн өгсөн. Намайг байхад Засгийн газраас хяналт шалгалт хийгээгүй атлаа сонсголоор ташаа мэдээллийг өгсөнд би маш их гайхаж байна.

Би 10-аас дээш сая төгрөгийн эмийг авахдаа гурван байгууллагаас үнийн санал авч, харьцуулаад шийдвэрээ гаргадаг журамтай, энэ дагуу эм авсан. Урвалжид их анхаарсан. Урвалж нийлүүлдэг компанийн удирдлагуудтай уулзсан. Олон жилийн турш урвалжаа нийлүүлсэн компанийнхыг авахгүй гэтэл тэд дээгүүр доогуур гүйгээд яамныханд энэ талаар хэлсэн юм билээ.

Б.Цэцэгсайхан бид хоёр яг ижил зовлонтой ажилласан. Гэхдээ надад яамнаас ийм эм ав гэж шахаж шаардаагүй. Би тэр шаардлагыг нь хүлээж авахгүй гэдгийг мэдсэн байх. Би одоогоор сүүлийн нэг жил 6 сарын турш ажилгүй байна. "Өргөө" амаржих газар 100 жилийн түүхтэй. Гэтэл энэ байгууллагаар их тоглож байна. Цар тахлын үед бүх эмнэлэг өртэй болсон. Гэтэл сонсголоо зөвхөн нэг эмнэлгийг л онцолж ярьж байгааг ер ойлгосонгүй” гэв