“Төрийн албан хаагч эмэгтэйчүүдийн манлайллын хөтөлбөр”-ийг гурав дахь жилдээ амжилттай зохион байгуулж байна.
Төрийн захиргааны албан хаагч эмэгтэйчүүдийн карьер хөгжлийг дэмжиж, тэдний ур чадварыг дээшлүүлэх замаар төрийн албан дахь удирдах түвшний жендэрийн ялгамжийг арилгах ажлын хүрээнд Төрийн албаны зөвлөл НҮБ-ын Хөгжлийн хөтөлбөртэй хэрэгжүүлж буй “Монгол Улсад мэргэжлийн, иргэн төвтэй төрийн албыг төлөвшүүлэх нь” төслийн шугамаар Эмэгтэйчүүд, залуучуудын оюуны сан ТББ-тай хамтран“Төрийн албан хаагч эмэгтэйчүүдийн манлайллын хөтөлбөр”-ийг ийнхүү амжилттай хэрэгжүүлж байгаа юм.
Хөтөлбөрийн энэ удаагийн сургалтад “Стратегийн баримжаатай хүний нөөцийн удирдлага”, “Ёс зүйн зөвлөлийг бэхжүүлэх нь” дэд төсөл хэрэгжиж байгаа яам, агентлаг, аймгийн Засаг даргын Тамгын газар зэрэг төрийн захиргааны 14 байгууллагаас сонгогдсон дараагийн шатны албан тушаалд дэвшин ажиллах магадлал бүхий 29 эмэгтэй албан хаагчид хамрагдаж байна.
Төрийн албан хаагч эмэгтэйчүүдийн манлайллын уг багц хөтөлбөр “Манлайллын сургалт”, “Коучингийн сургалт” болон “Менторшип хөтөлбөр” гэсэн үндсэн бүтцээс бүрддэг бөгөөд сонгон шалгарсан төрийн захиргааны эмэгтэй албан хаагчид менторуудын уулзалт, хэлэлцүүлэгт хамрагдан 3 сарын турш суралцах болно.
Сэтгэгдэл үлдээх