Ойрхи Дорнод дахь зэвсэгт мөргөлдөөн дахин хурцадсанаар дэлхийн эрчим хүчний нийлүүлэлтэд үүсэх эрсдэл нэмэгдэж, брент газрын тосны үнэ тавдугаар сараас хойш анх удаа баррель 100 ам.долларт хүрлээ. АНУ Ираны эсрэг цэргийн ажиллагаагаа эрчимжүүлсний дараа Пүрэв гаригт Брент газрын тосны үнэ нэг өдрийн дотор зургаан хувиас илүү өссөн байна. Үнийн өсөлтийг Йемений Хути бүлэглэл Улаан тэнгист газрын тос тээвэрлэгч хөлөг онгоцууд руу халдсан явдал улам өдөөжээ. Энэхүү бүс нь Саудын Араб Ормузын хоолойг тойрон газрын тос экспортлох чухал гарцын нэг юм. Үүний зэрэгцээ байгалийн хийн үнэ ч өссөөр байгаа бөгөөд Их Британийн жишиг хийн үнэ зургадугаар сарын сүүлчийн нэг терм нь 98 пенс байсан бол одоо 150 пенст хүрчээ.

АНУ, Ираны хооронд түр гал зогсоох тохиролцоо хийгдсэний дараа газрын тосны үнэ өмнө нь буурсан. Харин гал зогсоох хэлэлцээр нуран унасны дараа АНУ-ын Төрийн нарийн бичгийн дарга Марко Рубио “Ираны удирдлагууд хэлэлцээр байгуулахад бэлэн биш байна” гэж мэдэгджээ. Шинжээчдийн үзэж буйгаар газрын тос, эрчим хүчний үнэ өсөх нь Их Британи, АНУ зэрэг олон улсын инфляцыг дахин өдөөх эрсдэлтэй байна. Газрын тосны үнийн өсөлт нь шатахууны үнийг нэмэгдүүлээд зогсохгүй тээврийн зардал өссөнөөр хүнс болон бусад бараа бүтээгдэхүүний үнийг ч дагуулан өсгөдөг. Их Британийн инфляц зургадугаар сар хүртэлх нэг жилийн хугацаанд 2.6 хувь болж буурсан бол АНУ-д 3.5 хувь болсон ч Ойрхи Дорнодын нөхцөл байдал энэ бууралтыг удаан үргэлжлүүлэх эсэхэд эргэлзээ төрүүлж байна. Хамгийн сүүлийн мэдээллээр Их Британид долоодугаар сарын эхнээс хойш бензиний үнэ литр тутамд таван пенсээр нэмэгдэж, дунджаар 1.56 фунт стерлинг болсон бол дизель түлш литр нь 1.72 фунт хүрчээ. Харин АНУ-д бензиний дундаж үнэ дахин нэг галлон нь дөрвөн ам.долларыг давсан талаар жолоочдын эрх ашгийг хамгаалах  байгууллага мэдээлсэн байна. Хөрөнгө оруулалтын “Quilter Cheviot” компанийн менежер Жонатан Рэймонд “Эрчим хүч, шатахууны үнэ өсөх нь бизнесийн зардлыг нэмэгдүүлж, улмаар хүнс болон бусад барааны үнэд нөлөөлдөг. Энэ нь төв банкуудын инфляцтай хийх тэмцлийг улам хүндрүүлнэ” гэж онцолжээ. Түүний хэлснээр эрчим хүчний үнэ өндөр хэвээр үргэлжилбэл төв банкууд бодлогын хүүгээ удаан хугацаанд өндөр түвшинд хадгалах, цаашлаад дахин нэмэх дарамтад орж болзошгүй бөгөөд энэ нь зээл, ипотекийн төлбөртэй иргэдэд сөргөөр нөлөөлөх юм. Одоогоор Английн Төв банк бодлогын хүүгээ дөрвөн удаагийн дараалсан хурлаар 3.75 хувьд хэвээр үлдээсэн байна. Харин “Capital Economics”-ийн ахлах эдийн засагч Пол Дэйлс ойрын хугацаанд хүүг дахин хэвээр үлдээх магадлал өндөр ч эрчим хүчний үнэ тогтворжвол ирэх онд бууруулах боломжтой гэж үзжээ.

АНУ-ын Холбооны нөөцийн сангийн шинэ тэргүүн Кевин Уорш өнгөрсөн долоо хоногт Конгресст мэдүүлэхдээ “удаан хугацаанд өндөр хэвээр үргэлжлэх инфляцыг тэвчихгүй” хэмээн мэдэгдэж, Ойрхи Дорнодын мөргөлдөөний улмаас үнийн дарамт нэмэгдэж буй нөхцөлд “үнийн тогтвортой байдлыг сэргээх”-д анхаарна гэдгээ онцолсон байна.