Зам, тээврийн хөгжлийн сайд Л.Халтар ОХУ-ын “Оросын төмөр замууд” нээлттэй хувьцаат нийгэмлэгийн Ерөнхий захирлын нэгдүгээр орлогч, “Улаанбаатар төмөр зам” хувь нийлүүлсэн нийгэмлэгийн Ерөнхий хорооны дарга А.С.Павлов тэргүүтэй төлөөлөгчдийг хүлээн авч уулзав.
Талууд “Улаанбаатар төмөр зам” ХНН-ийн үйл ажиллагааны талаар санал солилцож, тулгамдаж буй асуудал, тухайлбал цар тахлын үр нөлөө, хилийн боомтууд дахь нөхцөл байдал, үнийн өсөлт инфляцтай холбоотой зардал нэмэгдэж байгаа, хөгжлийн төлөвлөлтийг хэрэгжүүлэхэд шаардлагатай хөрөнгө оруулалт, санхүүжилтийн тухай ярилцлаа. Түүнчлэн, шийдэх арга зам, төмөр замын техник технологийн шинэчлэл, зам, өртөөдийн засвар, өргөтгөл, хөдлөх бүрэлдэхүүний паркийн шинэчлэл зэрэг үйл ажиллагааг дэмжих чиглэлээр хийж буй ажлыг эрчимжүүлэх талаар санал солилцов. Мөн Монголд хэрэгжиж буй төмөр замын шинэ төслүүд, төлөвлөсөн төслүүдийн явцын талаар мэдээлэл хүргэжээ.
А.С.Павлов нь энэ оны 8 дугаар сарын 16-17-нд Улаанбаатар хотноо ажиллахдаа “Улаанбаатар төмөр зам” ХНН-ийн Ерөнхий хорооны ээлжит хуралдааныг хуралдуулж нийгэмлэгийн үйл ажиллагааны талаарх олон асуудлыг хэлэлцэн шийдэж, хурлын үр дүнгээр протоколд гарын үсэг зурсан аж.
Сэтгэгдэл үлдээх