ҮСХ: АИ-92 автобензиний үнэ литр тутамдаа 6.4 хувиар өсчээ

Үндэсний статистикийн хорооноос нийслэл болон орон нутагт худалдаалагдаж буй гол нэрийн өргөн хэрэглээний бараа, бүтээгдэхүүний үнийн судалгааг долоо хоног бүр танилцуулдаг. Энэ сарын 17-ны өдрийн байдлаар Улаанбаатар хотод өргөн хэрэглээний барааны дундаж үнэ өмнөх долоо хоногоосоо 1.6 хувь, өмнөх сарынхаас 3.5 хувиар тус тус буурсан эерэг үзүүлэлт ажиглагдлаа. Үнийн өөрчлөлтийг тухайлж харвал, хонины ястай мах килограмм нь 27,063 төгрөг байснаас 26,152 төгрөг болж нэг хувиар, үхрийн цул мах 36,611 төгрөг болж тус тус хямдарсан байна. Мөн үхрийн ястай мах килограмм нь 32,230 төгрөг байснаас 31,680 төгрөг болж 1.7 хувиар хямдарчээ. Хүнсний ногооны тухайд дотоодын үйлдвэрлэлийн төмс 10.6 хувиар буурч, килограмм нь 2883 төгрөг байснаас 2577 төгрөг болжээ. Харин бусад өргөн хэрэглээний бараа бүтээгдэхүүний үнэ өмнөх долоо хоногийн түвшинд тогтвортой байна. Орон нутгийн зах зээлд гол нэрийн барааны үнийн хөдөлгөөн харилцан адилгүй байна. Тухайлбал, аймгуудад гурил, элсэн чихэр болон дизель түлшний үнэ, АИ-92 автобензиний үнэ, цагаан будааны үнэ тодорхой хэмжээгээр өссөн бол мах махан бүтээгдэхүүн, сүүний үнэ өмнөх долоо хоногоос ялимгүй буурсан үзүүлэлттэй байна. Үхрийн мах 25,825 төгрөг, хонины мах 21,455, ямааны мах 18,677 төгрөг болж буурсан үзүүлэлтэй байна. Харин дизель түлш литр тутамдаа 0.6, АИ-92 автобензиний үнэ литр тутамдаа 6.4 хувиар өсчээ. Монгол Улсын хэмжээнд эдийн засгийн өсөлт хоёр оронтой тоо руу шилжихийн хэрээр нефтийн бүтээгдэхүүний үнийг даган гол нэрийн бараа бүтээгдэхүүний үнэ өсөх төлөвтэй байгаа ч одоогоор зах зээл дээрх үнийн бууралт болон тогтворжилт ийнхүү үргэлжилсээр байна.