Гол, усны ослоос 11 иргэний амь насыг авран хамгаалсан Хэнтий аймгийн Онцгой байдлын газрын 13 алба хаагчийг аймгийн Засаг дарга Ц.Чогсомжав хүлээн авч уулзан, тус бүр 500 мянган төгрөгийн мөнгөн урамшуулал олгожээ.
Онцгой байдлын газраас “Үер уснаас үрсээ хамгаалъя” аяны хүрээнд Аймгийн ЗДТГ, Цагдаагийн газар, Гэмт хэргээс урьдчилсан сэргийлэх ажлыг зохицуулах салбар зөвлөлтэй хамтран үер, уснаас урьдчилан сэргийлэх, авран хамгаалах арга хэмжээг гурван сарын хугацаанд зохион байгуулсан юм.
Энэ хугацаанд алба хаагчид 11 иргэний амь насыг авран хамгаалж, эцэг, эх, асран хамгаалагчийн хараа хяналтгүй явсан бага насны 216 хүүхдийг ар гэрт нь, мөн архи согтууруулах ундаа хэтрүүлэн хэрэглэж биеэ хянах чадваргүй 126 иргэнийг холбогдох байгууллагад хүлээлгэн өгч ажилласан байна.
Мөн Хэрлэн, Онон, Балж голын эрэг дагуу, Баян-Овоо, Баян-Адарга, Дархан, Баянмөнх сумдад амарч зугаалж байгаа 6,563 автомашинтай 12,470 иргэнд сэрэмжлүүлэг, анхааруулгыг хүргэн ажиллажээ гэж Хэнтий аймгийн Онцгой байдлын газраас мэдээллээ.
Сэтгэгдэл үлдээх