Улс орон тогтвортой хөгжье гэвэл эрдэмтдээ сонсож, судалгаа хөгжүүлэлтийн зардалд шаардлагатай хөрөнгийг ямар ч үед бууруулахгүй байх нь чухал.
Манай улсын ДНБ-д эзлэх судалгаа, хөгжүүлэлтийн зардал 0.1 хувь бол хурдацтай хөгжсөн Израиль 4.4, БНСУ 4.35 хувь байна.
БОАЖЯ-ны Төрийн нарийн бичгийн дарга Э.Баттулга Шинжлэх ухааны академи, түүний байгалийн ухааны чиглэлийн хүрээлэнгүүд, их сургуулиудын байгалийн ухааны сургууль, тэнхимийн захирал, эрхлэгч, эрдэмтэн нарийн бичгийн дарга нартай уулзжээ.Уулзалтаар дараах саналд нэгджээ:
-Төслийн шугамаар хийж буй судалгааны ажилд шинжлэх ухааны байгууллагуудыг түлхүү оролцуулах, цаашид төсөл хэрэгжүүлэх нэгжүүдийг их сургууль, хүрээлэнгүүдийг түшиглэн байгуулах,
-Байгаль орчны салбарын хэмжээнд ашиглаж буй тоног төхөөрөмж, багаж хэрэгслүүд, хяналтын цэгүүд, тэдгээрийн дата мэдээлэл, судалгааны үр дүнг эрдэм шинжилгээний байгууллагууд, төрийн байгууллагууд чөлөөтэй ашиглаж, давхардал гаргахгүй байх,
-Алслагдсан бүс нутгуудад тогтмол ажиллаж байгаа байгаль хамгаалагч, цаг уурын өртөө, харуулын техникчдийг анхан шатны судалгаа, мэдээлэл цуглуулах, хэмжилт хийх зэрэгт ашиглах, тэднийг сурах, мэргэжлээ дээшлүүлэхэд нь дэмжлэг үзүүлэх.
Чиглэл бүрээр анхаарах олон чухал саналууд гарсныг ажил хэрэг болсон тухай бүр нь мэдээлнэ гэж БОАЖЯ-наас мэдээлэв.
Сэтгэгдэл үлдээх