Ирэх оны долдугаар сарын 1-нээс хэрэгжиж эхлэх шинэ зохицуулалтаар скүүтер, мопедыг зөвхөн 18 нас хүрсэн иргэн жолоодох, улсын бүртгэлд бүртгүүлэх, үйлчилгээ эрхлэгчид хариуцлагын даатгалд хамрагдах зэрэг шаардлага тавигдаж байгаа. Мөн хууль зөрчсөн тохиолдолд Зөрчлийн тухай хуулийн дагуу хариуцлага тооцохоор болсон.
Тэгвэл Тээврийн цагдаагийн албанаас хууль хэрэгжүүлэхэд шаардлагатай журам, бүртгэл, сургалт, хяналтын тогтолцоо бүрэн бэлэн болох хүртэл скүүтер, мопедын үйлчилгээний үйл ажиллагааг түр хугацаанд зогсоох санал гаргажээ.
Тухайлбал, НИТХ-ын дарга Д.Ихбаяр "хууль хэрэгжүүлэх бэлтгэлийг яаралтай хангаж, төрийн байгууллагууд болон хувийн хэвшлийнхэн хамтран ажиллах шаардлагатай. Иргэдийн аюулгүй байдал, эрүүл мэндийг хамгаалах нь нэн тэргүүний асуудал, өнөөгийн нөхцөлд скүүтер, мопедыг явган хүний замаар зорчуулахгүй" гэдгийг онцолжээ.
Мөн нийслэлийн холбогдох байгууллагуудад скүүтер, мопедын зам, зогсоолын асуудлыг шийдвэрлэх, шаардлагатай журам, шийдвэрүүдийг богино хугацаанд боловсруулах үүрэг өгчээ. Хуулийн шаардлагыг хугацаанд нь хангаж чадахгүй тохиолдолд тухайн тээврийн хэрэгслийг хөдөлгөөнд оролцуулахгүй болохыг албаныхан анхааруулсан байна.
Ингэснээр 2026 оны долдугаар сарын 1-нээс эхлэн скүүтер, мопедын хэрэглээ илүү тодорхой дүрэм, хяналттайгаар зохицуулагдах нөхцөл бүрдэх аж.
Эх сурвалж NEWS.MN
Сэтгэгдэл үлдээх