2022 он гарснаас хойш дэлхийн 50 улсад сармагчны цэцэг өвчний халдварын лабораториор батлагдсан 3400 гаруй тохиолдол бүртгэгдэж, нэг хүн нас барсан талаар гэж Дэлхийн эрүүл мэндийн байгууллага /ДЭМБ/ мэдээллээ.
“2022 оны нэгдүгээр сарын 1-нээс зургаадугаар сарын 22-ны хооронд 50 улс орон, нутаг дэвсгэрээс сармагчны цэцэг өвчний 3413 тохиолдол, мөн энэ өвчнөөр нас барсан нэг тохиолдлын тухай мэдээг хүлээн авсан” гэж ДЭМБ мэдээлсэн байна.
Зургаадугаар сарын 17-нд өмнөх тойм мэдээг нийтэлснээс хойш найман улсад 1 310 шинэ халдвар бүртгэгджээ.
Сармагчны цэцэг өвчний тохиолдлын ихэнх нь буюу 86 хувь нь Европын орнуудад бүртгэгдсэн бол дараа нь Америк /11 хувь/, Африк /2 хувь/, Газрын Дундад тэнгисийн зүүн хэсэг /1 хүрэхгүй хувь/, Ази, Номхон далайн бүс нутаг /1 хүрэхгүй хувь/ орж байна.
Халдвар бүртгэгдсэн улс орнуудаас одоогоор Их Британид өвчлөл хамгийн их буюу 793 хүн уг өвчнөөр халдварлажээ. Түүнчлэн Герман (521), Испани (520), Португал (317), Франц (277), Нидерланд (167), АНУ-д (142) өвчлөл их байна. Үлдсэн 43 улс, нутаг дэвсгэрт өвчний тохиолдлын тоо 100-аас хэтрээгүй байна. Нас барсан ганц тохиолдол нь Нигери улсад бүртгэгджээ.
Сэтгэгдэл үлдээх