УИХ дахь АН-ын бүлгийн зөвлөх, эдийн засагч Р.Даваадорж даваа гаригт Үндсэн хуулийн цэцэд өргөдөл гаргажээ. Ямар асуудлаар хөндөж буй талаар тэр ингэж ярив.
"Шинэ хоршоо" хөдөлгөөнийг хэрэгжүүлэхийн тулд эрх баригчид 5 их наяд төгрөгийг Монгол банкны эх үүсвэрээр гаргаж авсныг би байж боломгүй асуудал гэж харж байна. Эрх баригчид сонгуулийн өмнө гурван секторт мөнгө тараадаг. Гэхдээ тэд ийм увайгүй үйлдэл хийж байгаад эдийн засагчийнхаа хувьд хүлээж байсангүй. Яагаад гэхээр, 5 их наяд төгрөг гэдэг бол Монгол Улсын төсвийн тав хуваасны нэгтэй тэнцэх хэмжээний мөнгө юм. Малчдад туслана гэдэг нэрийн дор, эрх баригчид өөрсдийн "идүүр"-ийг бэлдэж байна. Үүнээс өмнө 10 их наядаар Ковид-ын эсрэг хөтөлбөр хэрэгжүүлсэн. 200 төгрөгийн маскыг 20 мянган төгрөгөөр авч байсан. Үүнд хэн ч хариуцлага тооцоогүй учраас өнөөдөр эрх баригчид амтшаад 5 их наядаар "Шинэ хоршоо" хөтөлбөрийг хэрэгжүүлж байна. Энэ мөнгө жинхэнэ эзэддээ, малчдад очно гэдэгт би итгэхгүй байна. Эрх баригчид ард түмний зовлон, хүнд байдал дээр дөрөөлж, замбараагүй мөнгийг хэвлэж гаргаад дундаас нь ашиг олдог байдал хэрээс хэтэрлээ. Ийм жижиг зах зээлд асар их хэмжээний мөнгө ингэж гаргах нь инфляцийг өдөөнө, үнийг хөөрөгдөх эрсдэлтэй. Монгол банкны үндсэн үүрэг бол үнийн тогтвортой байдлыг хангах ёстой. Гэтэл Монгол банк мөнгө хэвлэж гаргаж, сонгуулийн өмнө улс орны эдийн засагт хүндрэл учруулж буйд харамсаж байна. Ингэхээр сонгуулийн дараа инфляци өсч, ард иргэдийн амьдрал хүндрэнэ. Иймээс би иргэн хүнийхээ хувьд Үндсэн хуулийн цэцэд дээрх асуудлаар өргөдөл гаргасан гэв.
Сэтгэгдэл үлдээх