Манай улс агаарын чанарын эрсдэлт байдлаараа дэлхийд тэргүүлсэн талаар "The Daily Star"-т гарсан нийтлэлийг орчуулан хүргэе.
Бангладешийн Дака хотын агаарын чанар энэ сарын 27-ны өдрийн байдлаар "маш эрүүл бус" ангилалд байв. Агаарын чанарын индексээр 256 оноотойгоор хамгийн их агаарын бохирдолтой хотуудын жагсаалтын хоёрдугаарт жагссан юм.
Харин нэгдүгээрт Монголын Улаанбаатар орсон бол гуравдугаар байрт Иракийн Багдад жагслаа. Улаанбаатар 283, Багдад 231 оноог тус тус авсан байна.
Агаарын чанарын индексээр 151-200 нь "эрүүл бус", 201-300 нь "маш эрүүл бус", 301-400 нь "аюултай" гэх ангилалд тооцогддог. Энэ нь оршин суугчдын эрүүл мэндэд ноцтой эрсдэл учруулдаг юм.
Агаар чанарыг ийм хэмжээнд хүргэж буй нь голлон бохирдуулагч бодис болох PM10 ба PM2.5, NO2, CO, SO2, озон гэх таван зүйлд суурилж байна. Дака хотын тухайд агаарын бохирдолтой удаан хугацаанд тэмцсээр ирсэн. Тус улсын агаарын чанар өвлийн улиралд эрүүл бус түвшинд байдаг бол салхитай, борооны улиралд сайжирдаг.
Дэлхий даяар иргэдийг хөгжлийн бэрхшээлтэй болох, нас барахад агаарын бохирдол хамгийн эрсдэлт хүчин зүйл болсоор байна. Бохирдсон агаараар амьсгалах нь хүнийг зүрх судасны, амьсгалын замын архаг өвчин, уушгины хорт хавдар тусах магадлалыг нэмэгдүүлж байдгийг хэд хэдэн судалгаагаар олон жилийн турш нотолсоор байгаа юм.
Сэтгэгдэл үлдээх