Иргэдийн бүртгэлд алдаа гарсантай холбогдуулан Цахим хөгжил харилцаа холбооны сайд Н.Учрал мэдээлэл өглөө.
Тэрбээр "Хүүхдийн мөнгөний асуудлын тухайд Засгийн газар анх удаа төрд байгаа мэдээллийг ашиглан тооцоолол хийж иргэдэд мэдэгдэл хүргүүлсэн. Мэдээллийн зөрүүтэй байдал бидэнд маш том саад болж ард иргэдийгээ бухимдууллаа. Үүнд хүлцэл өчиж байна. Өрхийн мэдээллийн сан хаяг дээр суурилдаг. Тийм учраас тухайн хаяг дээр байсан өмнөх хүмүүсийн мэдээлэл давхардаж гарч ирж байгаа асуудал гарсан.
Хаяг шилжүүлэх бол өөрийн биеэр очиж хийлгэдэг. Яагаад гэвэл иргэний зөвшөөрөлгүйгээр хаягийг дур мэдэн шилжүүлэх эрх төрд байхгүй шүү дээ. Жишээ нь, би Баянзүрх дүүргийн нэгдүгээр хороонд амьдарч байсан. Одоо 26 дугаар хороонд амьдардаг. Би хаягаа шилжүүлээгүйгээс болоод, манай хаяг дээр өмнө нь амьдарч байсан хүний хүүхдүүд нэмэгдээд, би одоо долоон хүүхэдтэй болчхоод байж байна.
Ердийн нэг ажлын өдөр дунджаар E-Mongolia-д 17 мянган хандалт байдаг. Өчигдөр 22.00 цагийн байдлаар нэг агшинд 300 мянган хандалт орж ирсэн. Ердийн ачааллаас 10-15 дахин нэмэгдсэн нь системд ачаалал болж гацсанд хүлцэл өчье. Цахим хөгжил, харилцаа холбооны яам, E-Mongolia академи шуурхай арга хэмжээ авч, ачааллыг тэнцвэржүүлсэн. Одоо хэвийн горимоор ажиллаж байна. Цаашдаа төрийн мэдээллийн системүүдийн мэдээллийн хоорондын зөрүүтэй байдлыг арилгаж, иргэдэд хүндрэл учруулахгүй, мэдээллийг нь зөвшөөрөлгүйгээр ямар ч тохиолдолд ашиглахгүй байх үүднээс маргааш /2023.01.18/ Засгийн газрын хурлаар Олон нийтийн сүлжээнд Хүний эрхийг хамгаалах хуулийг дагалдуулаад, Татварын тухай хуульд өөрчлөлт оруулна. Мэдээллийн эзний зөвшөөрлөөр ямар ч тохиолдолд мэдээллийг ашигладаг байх эрх зүйн орчныг баталгаажуулна. Та бүхэн 14 хоногийн хугацаанд Ehalamj, E-Mongolia системээр ороод хэрэв таны мэдээлэл зөрүүтэй байх юм бол линкний тэмдэг дээр дарж, хүсэлтээ илгээгээрэй. Мэдээллийг зохих түвшинд нь шинэчлэлт хийж, бүгдээрээ богино хугацаанд мэдээллийн сангийнхаа зөрүүтэй байдлыг арилгаж, хамтарч ажиллахыг иргэддээ уриалж байна" хэмээв.
Сэтгэгдэл үлдээх