Нийслэлийн автозамын түгжрэл түүний сөрөг нөлөөллийг бууруулах тусгайлсан хуулийн төслийг боловсруулж, УИХ-д өргөн барин намрын чуулганаар яаралтай горимоор хэлэлцүүлэхээр болжээ.
Нийслэл, ХЗДХЯ хамтран боловсруулсан эл хуулийг яаралтай горимоор хэлэлцвэл, энэ оны зургаадугаар сарын 1-нээс эхлэн хэрэгжинэ.
Хууль хэрэгжсэнээр нийслэлийн хэмжээнд бүсчлэл тогтоож, нийтийн тээврийн хэрэгслийн төлбөрийн системд өөрчлөлт орно.
Тухайлбал, зорчигч автобусаар хэдэн буудал явахаасаа хамаарч 500-1500 төгрөгөөр зорчиж, автомашин бүхий иргэд хотын төвийн автозамаар тогтоосон хэмжээнээс хэтрүүлэн зорчвол км тутамд 14-45 төгрөг төлж, хотын А бүсийн автозогсоолын үнэ дөрвөн цагаас дээш зогсвол цаг тутам 4500 төгрөг болж нэмэгдэнэ.
Одоогоор автомашинтайгаа нийслэлийн замын хөдөлгөөнд оролцохдоо хэдэн км явахаас үл хамаарч 20-40 мянган, иргэд хэдэн буудал зорчихоосоо үл хамаарч 500 төгрөг төлж буй. Харин шинээр хэрэгжих хуулиар хотын төвөөр жилдээ 5-7 мянган км-ээс илүү зам туулсан бол хэтрүүлсэн км тутамд 14-45 төгрөг төлнө. Мөн тээврийн хэрэгсэлтэй холбоотой төлбөр тухайн сардаа гарч, хугацаанд нь төлбөл хөнгөлөлт үзүүлж, төлөхгүй бол алданги тооцох улмаар замын хөдөлгөөнд оролцуулахгүй байх зохицуулалт хийжээ.
Түүнчлэн ирэх зургаадугаар сарын 1-нээс хотын А бүсийн зогсоолын төлбөр нэмэгдэнэ. Ингэхдээ эхний 30 минут үнэгүй, 1 цаг нь 1000, хоёр цаг нь 2500, дөрвөн цагаас дээш зогсвол цаг тутам 4500 төгрөг болох юм байна.
Сэтгэгдэл үлдээх