Эрэгтэйчүүдийн гэх тодотголтой " Гарьд Манлай " эмнэлгийн үүсгэн байгуулагч, Зөвлөх эмч, Клиникийн профессор З.Цэгмэдтэй үрийн шингэн ба үрийн суваг боох (Vasectomy) мэс заслын тухай ярилцлаа. 

Сүүлийн үед гэр бүлүүд эрчүүдийн үрийн суваг боолгох тухай их сонирохдог болжээ. энэ хэрээрээ буруу зөрүү ойлголтууд ч их гардаг юм шиг байна. Та энэ талаар товчхон ойлголт өгөөч.  

Жирэмснээс хамгаалах олон аргуудыг бодоход нэг хийлгэсэн бол бусад даавар агуулсан эм удаан хугацаагаар хэрэглэх, умайн хүзүү боох мэс засал, суулгац зэрэг олон аргуудас үнэ өртөгийн хувьд хямд байдаг. Үрийн шингэн гэдэг нь дур тавилтын үед төмсгөнд боловсорсон эр бэлгийн эсүүд үрийн сувгаар дамжин түрүү булчирхай, үрийн цэврүү зэрэг бусад нэмэлт булчирхайн шүүрлийн хамт шээдэг сүвээр ялгарах цагаан цайвар өнгөтэй шингэн юм. Хүний үрийн шингэн нэг удаагийн дур тавилтаар хэвийн үед 3-5 мл ялгардаг бол эрүүл нас биед хүрсэн эрэгтэй хүний 1 мл үрийн шингэнд ойролцоогоор 200 сая эр бэлгийн эс буюу сперматазойд агуулагдаж байвал хэвийн буюу үр тогтоох боломжтой гэж үздэг. Төмсгөнд эр бэлгийн эс үүсэх үйл явц хүний биеийн дулаанаас 2-4 цельсийн бага температурт явагддаг тул төмсөг хуухнагт биеэс зайтай байрлах зохицуулгатай. Үрийн шингэний 2-5 % нь төмсөгнөөс ялгарч эр бэлгийн эс агуулах ба үлдсэн хэсгүүд нь үрийн цэврүү, түрүү булчирхайн, булцуут хэсгийн булчирхайн шүүрлээс тогтоно. Үрийн суваг боох мэс заслыг энгийнээр ойлгоход төмсөгнөөс ялгарч буй эр бэлгийн эсийн замыг тасалж эрэгтэйчүүдийн үр тогтоох чадваргүй болгох мэс засал гэж ойлгож болно. 

Тэгвэл энэ мэс заслын дараа дур тавьж чадахгүй болох юм уу? Эсвэл эр хүний чалх эрт буурдаг гэх ойлголтууд байдаг. Энэ хэр бодитой вэ?

Ард иргэдийн дунд энэ мэс заслыг хийлгэснээр бэлгийн дур тавих үед үрийн шингэн ялгардаггүй гэсэн буруу бодол нийтлэг байдаг. Үнэндээ дур тавилтын үед үрийн шингэн ялгарах ч эр бэлгийн эс агуулаагүй буюу азоосперми байх тул үр тогтож жирэмслэлт явагдах боломжгүй болно. Гэхдээ ихэнхдээ гэр бүлийн байдал тогтворжсон хичээл насны эрчүүд дээрх мэс заслыг сонгон хийлгэдэг.

Энэ мэс заслыг хийлгэчихвэл дараа нь буцааж хэвийн болгох боломж байдаг уу?

Энэ мэс заслыг хийлгэсний дараа буцааж үрийн сувгийг холбох мэс засал хийхэд үр тогтоох чадвар 50% сэргэх магадлалтай гэж үздэг ч эр бэлгийн эсийн үйл ажиллагаа өмнөх шигээ хэвийн байдаггүй учир эргэлт буцалтгүй шийдсэн эрэгтэйчүүд хийлгэх хэрэгтэй. Үрийн суваг боох мэс заслыг хамтран амьдрагч хостойгоо ярилцаж санаа нийлсний үндсэн дээр хийлгэхийг зөвлөж байна.