2023 оны нэгдүгээр сарын 9-ний байдлаар улсын хэмжээнд томуу, томуу төст өвчний дэгдэлт алаг цоог буюу "Улбар шар" түвшинд хүрч, яаралтай тусламжийн тасагт үйлчлүүлж байгаа хүүхдүүдийн 72%, хүүхдийн тасагт хэвтэн эмчлүүлж байгаа хүүхдүүдийн 85%, сэхээнд байгаа хүүхдүүдийн 76% нь амьсгалын замын цочмог хүнд халдвартай байгааг ХӨСҮТ-ээс мэдээлсэн.
ЭХЭМҮТ-ийн Үндэсний төвийн хүүхдийн хүлээн авах яаралтай тусламжийн тасагт л гэхэд 24 цагийн дотор 350-380 хүүхэд үйлчлүүлж байна. Эдгээр хүүхдүүдийн 70-80 % нь амьсгалын замын өвчтэй байна. ЭХЭМҮТ-ийн Хүүхдийн эмнэлгийн яаралтай тусламжийн тасгийн эрхлэгч Б.Ариунхишиг эцэг, эхчүүдэд дараах зөвлөгөөг өглөө.
-Ханиадтай хүүхдээ эдгэртэл нь нийгмийн харилцаанд бүү оруулаарай-
- "Хүүхдүүд амарчихсан байгаа ч гэсэн эцэг эхчүүд өөрсдөө гадуур гарч байгаа учир өөрсдийн халдвар хамгааллаа сайн сахих шаардлагатай. Том хүмүүс дархлаа сайтай байдаг тул гаднаас авсан вирусийг хүүхдэдээ авчрах аюултай. Хүүхдээ сайн хооллож шингэн юм хангалттай уулгахыг зөвлөж байна. Шингэн ундаанд хярам, цайг уулгаарай, шүүс ундаанаас аль болох татгалзах хэрэгтэй. Мөн шим тэжээлтэй хоолыг багаар ойр, ойрхон өгөх нь зөв. Хүүхдийн дархлаа бага унтах, оройтож амарснаас үүдэн ихээр унадаг тул хүүхдээ эрт унтуулж дархлааг нь дэмжээрэй.
Хэрвээ нэгэнт ханиад томуу хүрсэн бол халдвар хамгааллын дэглэмээ барин эдгэртэл нь нийгмийн харилцаанд буюу сургууль цэцэрлэгт нь явуулахгүй байх хэрэгтэй. Энэ нь бусад хүүхдийг ч гэсэн хамгаалж байна гэсэн үг. Энэ улиралд томуу болон томуу төст гэсэн хоёр төрлийн вирус яваад байгаа. Хүүхдэд хийлгэдэг томуугийн вакцин нь дээр дурдсан гурван вирусээс сэргийлж чаддаг юм шүү.
Сэтгэгдэл үлдээх