Цасанд суусан тухай дуудлага мэдээлэл онцгой байдлын газарт тасрахгүй байна. Тухайлбал, Багануурт гурав, Багахангайд нэг, Төв аймагт хоёр бүртгэгдэж алба хаагчид шуурхай үүрэг гүйцэтгэж байна.
Тухайлбал Төв аймаг Эрдэнэ сумын нутаг дэвсгэр болох Өвөр Жанчивлангийн ойролцоо 100 иргэн тээвэрлэсэн хоёр автобус цасанд суусан гэх дуудлага мэдээллийн дагуу Налайх дүүргийн Онцгой байдлын хэлтсийн бүрэлдэхүүн өчигдөр орой ажиллажээ.
Мөн Багануур дүүргийн II хорооны нутаг Нарийны ам хэмээх газарт их хэмжээний цас орж халтиргаа гулгаа үүссэн байв. Энэ үед Портер, Приус-30 маркийн авто машинууд цасанд сууж, шатахуун дууссан, нялх хүүхэдтэй явж байна гэсэн дуудлагыг 12-р сарын 12-ны 17:50 цагт онцгойд ирүүлжээ. Дуудлагын дагуу Багануур дүүргийн Онцгой байдлын хэлтсийн бүрэлдэхүүн очиход 22-48 насны гурван том хүн, 0-13 насны таван хүүхэд осголтын байдалтай байсныг аюулгүй газар руу шуурхай тээвэрлэн амь насыг нь авран хамгаалсан байна.
Хүйтний эрч чангарч буй цас ихтэй байгаа энэ үед иргэд онцын шаардлагагүй тохиолдолд холын замд зорчихгүй, бага насны хүүхэд, өндөр настан, хөгжлийн бэрхшээлтэй иргэдийн аюулгүй байдлыг хангахыг нийслэлийн Онцгой байдлын газраас анхаарууллаа.
Сэтгэгдэл үлдээх